情人节——过街老鼠好折堕
人过情人节，我过情人节，点解我（哋）过得咁折堕？
本来呢啲日子都唔关我事嘅，又冇情人又冇目标，响屋企打磴咪好啰。点知自己唔争气，不甘寂寞，千猜揾個借口就叫咗阿John嚟，跟住call埋神出去食嘢。佢哋话要食大炒，咁我咪带佢哋去附近一间kopi茶铺，叫碟鸳鸯再加碟炆伊面啰，阿John又话要加个招牌豆腐。可以理解嘅，情人节女友唔响身边，想食吓出边啲豆腐，人之常情啫！点知食都最尾，厨房竟然忘记咗个招牌豆腐，搞到佢哋两只嘢唔上唔落，仲话要去第二度食过。
就喺从呢一刻开始，折堕呢只蓑嘢就跟到我哋实一实。先先我哋唸住食汉王（Burger King），而地点喺Ulu Klang佐近嘅山上，我揸车离远已经觉得唔妥，黑蒙蒙咁，行近先至发觉收咗档。冇计啦，唯有再唸过啰，咁啱行到靠近Ampang Point就去Dominos Pizza撞吓啋，一睇就知间铺头同我哋一样咁黑！转个弯嘅Pizza hut好啲，虽然打烊咗，仲有啲灯。
跟住又冇晒头绪嘞，一路上向着我屋企嘅方向进发，阿John竟然喺呢个时候话“不如攞啲肉乾去Cyber Cafe，一边打机一边咬肉乾”，搞到我哋唔知好嫐定好笑。唔经唔觉咁路过“不见不散”，啲人满到啥，我哋唸住呢摆冇死啰，唔单只要得食，仲要得睇女添。泊得车攞得位再睇埋张餐牌，正话要落佢order嘅时候，阿侍应小妹妹竟然同我哋讲“我哋厨房已经closed咗喎”。认真肚兰到极点，而家呢啲究竟喺乜嘢服务态度？
走啦，唔通喺度赖死唔走咩。好睬行过啲就有间叫做出名嘅“碳炒福建面”，虽然喺高朋满座，咁啱仲有个位留返俾我哋，啱啱坐低要叫茶，阿外劳先生同我哋撒手拎头，话卖晒咗！喂，我哋啲钱腥架？去到边度俾人赶到边度，好似啲过街老鼠咁，仲唔喺一只而喺三只咁多！
我哋边行边感叹原来冇情人嘅情人节喺咁难过嘅，都喺去啲定定揾食嘅地方啦。Desa Hartamas嘅汉王喺开通宵嘅，揸车到個度又喺黑蒙蒙咁，好睬仲有得打包！揸车埋到窗口，個个墙壁上嘅餐牌喺大，但喺远咗啲睇唔清楚，同收银马来妹攞個餐牌又话冇，都喺落车睇返够本。落完order仲要嗒返几句嗲，撩吓个马来妹，complain個餐牌太远睇唔清楚。你哋话折堕唔折堕啊？情人节揾唔到食仲要去撩个卖汉王嘅马来妹，真喺顶我哋唔顺啰！
祝：天下（真正）有情人，终成眷属！骗财骗色扼感情嘅扑街冚家铲！哇哈哈哈哈。。。
